Kina i akuzoi Shtetet e Bashkuara se po kërcënojnë paqen dhe stabilitetin në ngushticën e Tajvanit pasi një luftanije amerikane kaloi mes detit që ndan ishullin nga fqinji i tij i madh. Flota e 7 e Marinës amerikane tha se destrojeri USS Curtis Wilbur me raketa Arleigh Burke po kryente një levizje rutinë në ngushticë, në përputhje të plotë sipas sja me ligjin ndërkombëtar. “Tranziti i anijes përmes ngushticës së Tajvanit demonstron përkushtimin e SHBA për një Indo-Paqësor të lirë dhe të hapur, ”thuhet në deklaratën e publikuar në faqen e saj të internetit. "Ushtria e Shteteve të Bashkuara do të vazhdojë të fluturojë, lundrojë dhe të veprojë kudo që e lejon ligji ndërkombëtar," theksohet më tej. Por autoritetet kineze e kundërshtuan ashpër këtë veprim që vjen në mesin e një përshkallëzimi të tensioneve mes dy fqinjëve. "Lëvizjet e SHBA-së i dërgojnë sinjale të gabuara forcave të pavarësisë së Tajvanit, duke dëmtuar qëllimisht situatën rajonale dhe duke rrezikuar paqen dhe stabilitetin përtej ngushticës së Tajvanit," tha zëdhënësi i komandës lindore kineze. Ai shtoi se anija amerikane u gjurmua dhe monitorua gjatë gjithë udhëtimit të saj. Kina beson se qeveria e zgjedhur në mënyrë demokratike e Tajvanit është e vendosur të shpallë zyrtarisht pavarësinë e ishullit, e kjo për Pekinin përbën një vijë të kuqe.