Shqetësimet e lidhura me kërkesën globale si dhe pasojat e konfliktit mes Izraelit dhe Hamasit, kanë ndikuar në cmimin e naftës duke sjellë një rënie të tij në tregjet botërore. Tregu i naftë së papërpunuar, Brent, që njihet si kontrata ditore me para në dorë, e mbylli ditën të martën me rreth 82.34 dollarë për fuçi. Tregu Brent shihet si pikë referimi e çmimeve globale të naftës së papërpunuar, ndërsa tregu WTI ka të bëjë me çmimet e naftës bruto në Shtetet e Bashkuara. Tregu tjetër i naftës bruto “West Texas Intermediate” për dërgesat e muajit mars shënoi një çmim prej 78.18 dollarë për fuçi. Kontratat për muajin prill parashikojnë një çmim prej 77.04 dollarë për fuçi në tregun amerikan, thote VOA. Kjo ndodh në një kohë kur transporti detar është përballur me pengesa madhore si rezultat i sulmeve me raketa nga lëvizja Houthi e lidhur me Iranin. Organizata terroriste i ka lidhur sulmet e saj me konfliktin mes Izraelit dhe Hamasit. Houthit pretendojnë se sulmet e tyre mbështesin kauzën e Hamasit. Që nga e premtja, ata kanë goditur me dronë e raketa të paktën katër anije mallrash. Investitorët megjithatë duken më të shqetësuar nga rënia e kërkesës globale për naftë, sidomos pasi Kina njoftoi uljen më të madhe ndonjëherë të kërkesës për prag nga tregu i saj. Një raport i Agjencisë Ndërkombëtare të Energjisë (IEA) rishikoi javën e kaluar parashikimet për kërkesat për naftë gjatë vitit 2024, duke treguar rënie të kërkesës me pothuajse një milion fuçi në ditë më pak se parashikimet e OPEC-ut.