Brenda pak orësh Presidenti i Shteteve të Bashkuara të Amerikës, Donald Trump, mbajti dy qëndrime të ndryshme në lidhje me luftën Rusi-Ukrainë. Fillimisht u duk se ai bëri një kthesë të fortë 180 gradë kundrejt Rusisë, pasi homologu Vladimir Putin sfidoi përpjekjet e tij për t’i dhënë fund luftës 3-vjeçare me Ukrainën, duke intensifikuar sulmet ndaj Kievit. Pas një nate të përgjakshme në Ukrainë, ku Rusia kreu sulme të ashpra me dronë, Presidenti Donald Trump paralajmëroi shefin e Kremlinit për sanksione dhe tarifa bankare në shkallë të gjerë. “Duke u bazuar në faktin se Rusia po “godet” Ukrainën në fushën e betejës tani, unë po shqyrtoj seriozisht sanksione të mëdha bankare, sanksione dhe tarifa ndaj Rusisë deri sa të arrihet një armëpushim dhe një MARRËVESHJE PËRFUNDIMTARE PËR PAQEN. Për Rusinë dhe Ukrainën, uluni tani në tavolinën e bisedimeve, para se të jetë vonë. Faleminderit!!!” Ky qëndrim i fortë i Shtëpisë së Bardhë erdhi në një kohë, kur edhe Polonia, shteti fqinj i Ukrainës, ka nisur përpjekjet për mobilizimin e ushtrisë, si shenjë rreziku nga Rusia. Krerët e shtetit polak njoftuan këtë të premte se po planifikojnë trajtimin e detyrueshëm ushtarak për të gjithë burrat e rritur, duke mos përjashtuar madje as gratë. Mirëpo kur dukej se Trump po “anonte” në favor të Ukrainës duke zgjuar shpresën tek BE për një qasje ndryshe ndaj konfliktit, kreu i Shtëpisë së bardhë ka suprirzuar sërish. Mbrëmjen e së premtes ai ka deklaruar se është “ka besim se Putin do ta mbajë fjalën”, ndërsa shtoi se “e ka më të vështirë të negociojë me Kievin se sa me Moskën për përfundimin e luftës”.