Presidenti amerikan Donald Trump do të flasë sot me kryeministrin Justin Trudeau. Trump u tha gazetarëve se do të flasë edhe me presidenten e Meksikës, Claudia Sheinbaum, pasi kjo e fundit tha se do të shpallë kundërmasa ndaj SHBA-së. Kjo vjen pasi të shtunën, Presidenti Trump nënshkroi një urdhër ekzekutiv për vendosjen e tarifave të reja prej 25 për qind për mallrat që importohen nga Meksika dhe Kanadaja dhe një tarifë shtesë prej 10 për qind për importet nga Kina, duke nisur nga dita e martë, njoftoi Shtëpia e Bardhë. “Si Kanadaja dhe Meksika kanë lejuar hyrjen e pashembullt në SHBA të emigrantëve të paligjshëm si edhe të fentanilit (lloj droge) që po u merr jetën amerikanëve”, tha zëdhënësja e Shtëpisë së Bardhë gjatë një konference për shtypin, të premten. Ndërsa tarifa për mallrat që do të vijnë nga Kanadaja do të jetë 25 për qind, Presidenti Trump tha se tarifa për naftën e papërpunuar të importuar nga ky vend do të jetë 10%. Specifikisht për Kanadanë, Trump anuloi përjashtimin ndaj detyrimeve tatimore për dërgesat me vlerë më pak se 800 dollarë.