Disa muaj më parë Presidenti amerikan, deklaronte se nëse fitonte zgjedhjet do t’i jepte fund luftës Rusi-Ukrainë Brenda ditës. Ishte kohë fushate. Tani, më shumë se 100 ditë pasi ka fitoi mandatin e dytë në krye të Shtëpisë së bardhë, është gati të tërhiqet. Donald Trump, deklaroi të premten para gazetarëve se nëse Rusia dhe Ukraina e vështirësojnë arritjen e marrëveshjes së paqes, atëherë Shtetet e Bashkuara do të tërhiqen nga procesi negociator. “Nëse për ndonjë arsye njëra nga të dyja palët e bën të vështirë vazhdimin e procesit... atëherë ne thjesht do të tërhiqemi dhe nuk do të marrim pjesë. Shpresojmë se nuk do të na duhet ta bëjmë këtë”, ka thënë Trumpi. Ai ka shtuar se beson që ka “gjasa të mira” për të “zgjidhur problemin”, ndërsa ka këmbëngulur se nevojitet më shumë entuziazëm nga të dyja palët për t’i dhënë fund luftës. “Besoj se po e shoh atë entuziazëm. Shpresoj ta shoh edhe gjatë këtyre ditëve vendimtare nga të dyja palët”, ka vazhduar ai. Më herët gjatë ditës së premtes, sekretari amerikan i Shtetit, Marco Rubio, deklaroi se SHBA-ja mund të tërhiqet nga negociatat Ukrainë – Rusi nëse nuk ka progres të shpejtë.