Lufta e re energjetike botërore sapo ka filluar, këtë e dëshmon edhe udhëtimi i fundit i kancelarit gjerman Olaf Scholz në Kanada. Gjermania po shikon nga e ardhmja, po bën sot atë që duhet të kishte bërë njëzet vjet më parë. Misioni i Scholz-it në Kanada trajtonte shumë tema, lajmet u fokusuan në furnizimet me gaz natyror dhe hidrogjen. Përgjigja e kryeministrit kanadez Justin Trudeau nuk është ngushëlluese. Kanadaja ka shumë gaz, por "në vendet e gabuara". Ka plane për të ndërtuar terminale të rinj në brigjet e Atlantikut të Kanadasë, pra përballë Evropës, por do të duhen vite që të jenë gati. Por me rëndësi strategjike, pra loja më interesante ka të bëjë me blerjet e litiumit dhe mineraleve të tjera të rralla për bateritë që industrisë gjermane te automjeteve do t'i duhen gjithnjë e më pasi dëshiron të konvertojë makinat me karburant në elektrike. Kanadaja është një lojtar kyç në lojën e madhe gjeostrategjike pasi zotron toka te rralla dhe minerale apo metale si litiumi. Sigurisht që këtë e kanë kuptuar Mercedes Benz dhe Volksëagen, të cilët me rastin e vizitës së Scholz nënshkruan marrëveshje me partnerët kanadezë për të siguruar akses në nikel, kobalt dhe litium, tre komponentë thelbësorë për bateritë. Parashikimet e Bloomberg shohin një rritje të shitjeve të makinave elektrike nga 10% e totalit të vitit të kaluar në 40% deri në vitin 2030. Por të gjithë prodhuesit e makinave elektrike janë në një situatë varësie të rrezikshme nga Kina pasi ajo kontrollon 80% të prodhimit botëror të komponentëve të makinave elektrike. Kohët e fundit, prodhuesi më i madh global i baterive, CATL i Kinës, njoftoi se do të ndërtojë fabrikën e dytë evropiane giga në Hungari, për të furnizuar industrinë gjermane. Nga gjashtë prodhuesit kryesorë botërorë, dy të parët janë kinezë, të ndjekur nga tre koreanë dhe një japonez. Gjermania e ka kuptuar se gara për të siguruar furnizime të sigurta me minerale të rralla ka filluar tashmë prej shumë vitesh dhe kinezët aktualisht po e fitojnë atë.