Industria e mbrojtjes së Ukrainës duhet të integrohet me atë të Bashkimit Evropian me qëllim që të nisë sa më shpejt prodhimi i pajisjeve ushtarake direkt në Ukrainë. Deklarata u bë në Bruksel nga Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell në kuadër të Forumit të Industrive të Mbrojtjes. "Janë më shumë se 140 firma që vijnë nga 25 vende dhe duhet të shohim se cilat janë mundësitë për të përdorur fondet evropiane, për të prodhuar armë më shumë dhe më shpejt. Nëse është e mundur, drejtpërdrejt në Ukrainë është e rëndësishme që prodhimi të mund të bëhet në Ukrainë nga firmat ukrainase, të mbështetura nga firmat e BE-së” Forumi i parë i Industrive të Mbrojtjes BE-Ukrainë u mbajt në Ukrainë, takimi i dytë u mbajt në Shtetet e Bashkuara dhe i treti u organizua nga Brukseli. Veprimtaria mblodhi së bashku më shumë se 350 pjesëmarrës, duke përfshirë përfaqësues të organizatave qeveritare dhe bizneseve evropiane me qëllim mbështetjen dhe integrimin e mëtejshëm të industrisë së mbrojtjes ukrainase në industrinë evropiane të mbrojtjes për të përmbushur menjëherë nevojat e Ukrainës në armatime dhe pajisje ushtarake dhe për të rritur aftësitë e prodhimit evropian të mbrojtjes.