Mbretëria e Bashkuar dhe Shqipëria thellojnë bashkëpunimin në luftën kundër emigracionit të paligjshëm dhe krimit të organizuar. Në një deklaratë të përbashkët, ministritë e Punëve të Brendshme të dy vendeve theksojnë vendosmërinë për të luftuar grupet kriminale dhe emigracionin e paligjshëm. Fokusi kryesor u vu te parandalimi dhe ndërprerja e rrugëve të emigracionit të paligjshëm, edhe përmes Taks Forcës së Përbashkët Rajonale të Migracionit. Autoritetet britanike dhe shqiptare nënvizuan nevojën për të zvogëluar lëvizjen e parregullt të shtetasve shqiptarë drejt Mbretërisë së Bashkuar, ku u ra dakord për forcimin e bashkëpunimit dhe për gjetjen e një zgjidhje të qëndrueshme. Autoritetet e zbatimit të ligjit të Londrës dhe Tiranës përsëritën angazhimin e tyre të përbashkët për të identifikuar, ndërprerë dhe ndjekur penalisht anëtarët e bandave kriminale, të përfshirë në aktivitete të paligjshme në nivel global. Kjo do të përfshijë veprime të përbashkëta për të forcuar aftësitë dixhitale të mbledhjes së provave për të luftuar krimin e organizuar, përfshirë krimin kibernetik. Gjithashtu, Mbretëria e Bashkuar riafirmoi angazhimin e saj për të mbështetur përpjekjet e Shqipërisë në luftën ndaj korrupsionit dhe për ndërtimin e institucioneve efektive dhe të përgjegjshme të drejtësisë.