Inteligjenca artificiale po e ndan botën e punës : nga njëra anë, po shkakton panik, më shumë njerëz që kanë frikë se do të zëvendësohen; nga ana tjetër, po krijon një kërkesë në rritje për talente të specializuara që kompanitë po përpiqen ta gjejnë. Dy studime të kohëve të fundit, njëri nga zyra e kryetarit të Bashkisë së Londrës dhe tjetri i raportuar nga “Il Sole” në Itali, ofrojnë një pamje të saktë të këtij skenari kontradiktor, në të cilin e njëjta teknologji që kërcënon miliona vende pune po gjeneron njëkohësisht mundësi të reja për ata që dinë ta shfrytëzojnë atë. Pothuajse gjysma e fuqisë punëtore të Londrës punon në vende pune ku “AI” mund të transformojë disa nga aktivitetet e tyre. Kryeqyteti është më i ekspozuar se çdo rajon tjetër në Mbretërinë e Bashkuar: afërsisht 2.4 milionë njerëz punojnë në profesione të klasifikuara si "Profesione të ekspozuara ndaj “AI” gjeneruese", ekuivalente me 46% të fuqisë punëtore të qytetit , krahasuar me një mesatare kombëtare prej 38%. Kryebashkiaku Sadik Khan komentoi raportin duke thënë se inteligjenca artificiale do të transformojë rolet në vend që t'i eliminojë ato tërësisht, duke ndryshuar përzierjen e detyrave dhe aftësive të kërkuara. Por ai paralajmëroi gjithashtu se aty ku kërcënimi për vendet e punës është real, ne duhet të jemi të gatshëm të reagojmë shpejt. Gratë janë më të ekspozuarat. Përafërsisht 8% e grave që punojnë në Londër bëjnë pjesë në kategorinë që prek inteligjencën artificiale, krahasuar me 4% të burrave. Punëtorët më të rinj janë gjithashtu më të prekshëm: afërsisht 52% e moshës nga 16 deri 29-vjeçar punojnë në vende pune shumë të ekspozuara ndaj inteligjencës artificiale, krahasuar me 39% të atyre të moshës 50 vjeç e lart. Niveli më i lartë i rrezikut prek afërsisht 313,000 punëtorë, 6% të fuqisë punëtore të Londrës. Këto janë kryesisht punë administrative dhe zyre : kontabilistë mbështetës, menaxherë pagash, nëpunës të futjes së të dhënave dhe recepsionistë.