Pak surpriza, rinovime e shumë zhgënjime! Sali Berisha vjen në zgjedhjet e 11 Majit me një listë të larmishme, duke shpërblyer të gjithë besnikët dhe deputetët që u bashkuan me të, duke ikur nga Lulzim Basha. Ashtu si kryesocialisti Rama, edhe Berisha kryeson listën e mbyllur të demokratëve në Qarkun e Tiranës, duke siguruar kështu edhe një tjetër mandat deputeti në Kuvendin e Shqipërisë. Vend të sigurt në listën e kryeqytetit, Berisha i jep aleatit Fatmir Mediu të Partisë Republikane, ndërsa lë në listë të hapur Ilir Metën e Partisë së Lirisë dhe Shpëtim Idrizin e PDIU, si dhe disa emra të vjetër nga radhët e PD. Përparësi për Berishën marrin edhe disa emra të Primareve, si Igli Cara që vendoset në listën e mbyllur të Durrësit, apo Eduart Sharka dhe Saimir Korreshi në listën e Fierit. Kryedemokrati vë në listë të sigurt edhe ata që e mbështetën në fushatën e tij të Foltores dhe demokratët që u bashkuan me të pas zgjedhjeve lokale. Kështu, Gazment Bardhi kryeson listën e mbyllur të demokratëve në Fier, Agron Gjekmarkaj kryeson në Lezhë, Flamur Hoxha në Kukës dhe Xhelal Mziu në Dibër, të cilët kanë të sigurt karrigen e deputetit në sesionin e ri parlamentar. Berisha ka shkaktuar pakënaqësi te shumë deputetë aktualë të Partisë Demokratike, duke i renditur në listë të hapur, ku një pjesë e tyre janë tërhequr nga gara, si Oriela Nebiaj dhe Ilda Dhori. Ndërkohë që vetëm një pjesë e deputetëve aktualë kanë pranuar të garojnë në listën e hapur të Berishës, si Jorida Tabaku, Dhurata Çupi, Kreshnik Çollaku, Ilir Alimehmeti, Edmond Spaho, Asllan Dogjani dhe Petrit Doda.