Kryesocialisti Edi Rama zyrtarizoi ekipin që do të garojë në zgjedhjet parlamentare të 11 majit, në të gjitha qarqet e vendit. Lëvizje surprizë, emra të rinj, por edhe ministra që kanë të sigurt karrigen në Parlament. Është kjo panorama e listës me kandidatët për deputetë të Edi Ramës, i cili vjen më 11 Maj me një rinovim të Grupit Parlamentar të PS, ndërsa vendos të gjithë senatorët në garë në listë të hapur. Kryeministri Edi Rama kryeson listën e mbyllur të socialistëve në Qarkun e Tiranës, ndërsa figura të vjetra të PS, si Erjon Braçe, Pandeli Majko, Fatmir Xhafaj, Damian Gjiknuri dhe Arben Pëllumbi do duhet të luftojnë për vota për të siguruar një tjetër mandat në kryeqytet, pasi janë renditur në listën e hapur. Ashtu siç ishte paralajmëruar, një pjesë e madhe e listës është e përbërë nga figura të reja, shumica e të cilëve janë pjesë e platformës “Deputeti që Duam”. 12 drejtuesit e qarqeve të PS, që e kanë vendin të sigurt në listën e mbyllur, prezantuan emrat e kandidatëve për secilin qark. Binte në sy tendenca e selisë rozë për një listë të diversifikuar, me një përqindje të lartë të grave dhe rinisë. Në Shkodër lista e mbyllur kryesohet nga Marjana Koçeku, një prurje e re nga platforma “Deputeti që Duam”, ndërsa deputetët aktualë të qarkut, Edona Bilali dhe Frrok Gjini, do të jenë në listën e hapur. Paulin Sterkaj dhe Agron Çela largohen, ndërsa ky i fundit ka futur në listën e sigurt vajzën e tij, Xhenis Çela. Durrësi kryesohet në listë të sigurt nga deputetja aktuale Klodiana Spahiu, ndërsa në listën e hapur janë vendosur shumë emra të rinj. Në Fier udhëheq zëvendëskryeministrja Belinda Balluku, ndërsa mandat të sigurt ka edhe ministri i Financave, Petrit Malaj, i ndjekur nga tre emra të rinj, që do të zënë ulëse nga radhët e PS në Kuvend. Në Korçë kryeson në listë të sigurt Niko Peleshi, ndërsa e ndjekin zëvendësministrja Romina Kuko dhe Gentin Lakollari, nënkryetar i Bashkisë së Devollit. Largohen nga ky qark emrat e njohur si Olta Xhaçka dhe Blerina Gjylameti, të cilat do të jenë në listën e hapur të Tiranës. Në Elbasan i pari është Arbjan Mazniku si drejtues qarku, i cili ndiqet nga ministrja Bora Muzhaqi dhe deputetja Evis Kushi. Kjo e fundit mbetet në listën e sigurt, edhe pse ka qenë deputete për tre mandate. Listës i janë shtuar gjithashtu emra të rinj. Në Lezhë dy të sigurtët janë Ulsi Manja dhe Ermal Pacaj. Dy qarqet me numër të ulët mandatesh, Gjirokastra dhe Kukësi, do të kenë në listë të sigurt vetëm drejtuesit politikë, përkatësisht Mirela Kumbaro dhe Eduart Shalsi, ndërsa emrat e tjerë renditen në listën e hapur.