Pavarësisht se aksidenti në Fier ku u përfshi pedagogu i njohur italian i Biologjisë, në Universitetin e L’Aquilws Michele D’Angelo përfundoi me vdekjen e një 16-vjeçari nga Patosi dhe plagosjen e tre të tjerëve, diplomacia ka bërë punën e saj dhe ai është lënë i lirë. Mediat italiane që prej më shumë se dy muajsh i kanë kushtuar artikuj të tërë burgosjes së shkencëtarit me famë ndërkombëtare, sot i bëjnë jehonë lirimit të tij falë ndërhyrjes së diplomacisë. Top Channel ka siguruar vendimin e gjykatës, i cili thekson se 44-vjeçari D’Angelo është lënë i lirë me kusht pas pagesës së 15 mijë eurove. Prokuroria e Fierit nuk ka mbyllur ende hetimet, por mediat italiane thonë se ekspertiza përfundimtare pritet ta nxjerrë të pafajshëm për akuzat për shkelje të rregullave të qarkullimit rrugor” dhe “braktisje të automjetit” pas aksidentit ku humbi jetën një adoleshent. Hetimet e Prokurorisë duhet të përfundojnë me ligj deri në mesin e nëntorit. Por diplomacia arriti të përshpejtojë afatet, duke e nxjerrë nga burgu dhe duke i mundësuar kthimin në Itali, së bashku me bashkëshorten Vannesa.