Një operacion i koordinuar mes Forcave të Ndërhyrjes së Shpejtë dhe Policisë së Vlorës ka bërë të mundur lirimin e një shtetasi nga Kosova, i cili dyshohet se mbahej peng prej dy javësh nga katër persona. Të dyshuarit, të gjithë me origjinë nga fshatrat e Lumit të Vlorës, e mbanin pengun në një banesë pranë “Rrugës së Re”, ndërsa sipas burimeve policore, ata i kërkonin 70 mijë euro për ta lënë të lirë. Ndërhyrja e policisë u bë pas denoncimit të motrës së personit të rrëmbyer, e cila jeton në Suedi. Ajo kishte njoftuar autoritetet për dyshimet se vëllai i saj ishte rrëmbyer, çka çoi në lokalizimin e banesës dhe shoqërimin e menjëhershëm të katër personave të përfshirë. Nga të dhënat paraprake mësohet se i rrëmbyeri është keqtrajtuar gjatë periudhës dyjavore të privimit të lirisë. Hetimet vijojnë për të zbardhur motivet dhe përgjegjësitë e secilit prej të dyshuarve.