Gjykata e Korçës ka liruar dy vajzat e akuzuara për publikimin e videove, fotove dhe materialeve denigruese për bashkëmoshatarët e tyre përmes një faqe instagrami. Vajzat 17 dhe 19 vjeçare, u arrestuan 3 ditë më parë nga policia me akuzën e pornografisë me të mitur pasi ato administronin një faqe në rrjetin social instagram në të cilën për ditë me rradhë u publikuan mesazhe me përmbajtje shantazhuese dhe video e foto me përmbajtje pornografike të bashkëmoshatareve të tyre. Prokuroria e Korccës kërkoi për të dyja vajzat masën e arrestit në shtëpi deri në përfundim të hetimeve për P.M dhe E.P, por gjyqtari Klajdi Tërova ka vendosur që ndaj 19 vjeçares të caktojë masën e sigurisë detyrim paraqitje ndërsa për 17 vjeçaren mbikqyrje nga prindërit. Seanca gjyqësore ka zgjatur gati 2 orë e 30 minuta dhe pasi organi i akuzës ka parashtruar të gjitha provat e siguruara për këtë çështje i ka kërkuar gjykatës që vajzat të qëndrojnë në arrest shtëpie ndërsa avokatët e tyre mbrojtës kanë kërkuar masë më të butë sigurie se ajo që kërkoi prokuroria çka është marrë në konsideratë nga gjyqtari i çështjes. Sakaq mësohet se hetimet do të vazhdojnë për të provuar përgjegjësinë e vajzave dhe të të rinjve të tjerë të përfshirë në këtë ngjarje.