Policia britanike kundër terrorizmit njoftoi lirimin me kusht të pesë personave të arrestuar për komplotin e dyshuar pranë bazës ajrore Fairford. Autoritetet angleze deklaruan se të pesë personat janë shtetas britanikë, të moshës mes 20 dhe 25 vjeç, dhe pavarësisht lirimit me kusht, hetimi ndaj tyre do të vazhdojë. Të rinjtë u arrestuan, pasi banorë të zonës njoftuan policinë për tre automjete që po lëviznin drejt bazës ajrore në Gloucestershire, e cila përdoret nga forcat ajrore amerikane në operacionet e saj kundër Iranit. Ata u ndaluan nën dyshimet për përgatitjen e një akti terrorist, dhe autoritetet britanike dyshojnë se po vepronin në emër të një shteti të huaj. Autoritetet në Britani po hetojnë nëse Irani fshihet pas komplotit të dyshuar në bazën e përdorur nga amerikanët, por në një reagim të hënën, ambasada e Republikës Islamike të Iranit në Londër hodhi poshtë përfshirjen e Teheranit. Sekretarja e Brendshme e Britanisë së Madhe, Shabana Mahmood, tha në një konferencë për media se hetimi kundër terrorizmit ndaj sulmit në Fairford shërben si një kujtesë se “në një kohë kërcënimi në rritje, të gjithë duhet të qëndrojnë vigjilentë”. Ajo iu drejtua me një mesazh të qartë të gjithë atyre që tentojnë të kryejnë sulme në tokën britanike, teksa u shpreh se “Ju kurrë nuk do të na mposhtni”. Pas ngjarjes në bazën ajrore u evakuuan 85 familje të fshatit dhe policia rrethoi gjithë zonën, ndërsa Sekretarja e Brendshme njoftoi se tashmë zona është e sigurt dhe banorët e prekur po kthehen në shtëpitë e tyre.