Autoritetet njoftuan se e premtja do të hapte kufirin në Egjipt duke lejuar kalimin e ndihmave humanitare, por ende nuk ka kalime të kamionëve që po presin në radhë. Egjipti deklaroi se kalimi kufitar Rafah me Gazën ishte i hapur nga ana e tyre, teksa hodhi akuza kundrejt Izraelit se ka refuzuar hyrjen e ndihmave. Dy pengje janë liruar nga militantët e Hamasit, ndërsa ende të paktën 198 persona të tjerë ndodhen në duart e tyre. Lënia e lirë e tyre u konfirmua nga ushtria izraelite. Gjysmëhëna e Kuqe Palestineze njoftoi se forcat izraelite kanë lëshuar një urdhër evakuimi në spitalin Al-Quds në Gaza, për shkak të rrezikut. Spitali aktualisht është shtëpia e mbi 400 pacientëve dhe 12,000 civilëve të zhvendosur. Ministri izraelit i Mbrojtjes Yoav Gallant paralajmëroi se lufta do të jetë e gjatë dhe e ndarë në tre faza, të cilat i shpjegoi paraprakisht. Sinkron: Yoav Gallant, Ministri izraelit i Mbrojtjes "Së pari do të shkatërrojmë organizatën Hamas dhe infrastrukturën ushtarake e qeveritare. Faza tjetër pas kësaj do të jetë më e zgjatur, është një fazë e stabilizimit të sistemit. Dhe në fund, do të arrijmë në një situatë ku do të ketë regjim sigurie krejtësisht të ndryshme”. Në territoret e Palestinës, përkatësisht në Ramallah, ka pasur përleshje të dhunshme mes forcave të sigurisë së Izraelit dhe banorëve vendas, që kanë djegur goma e kanë gjuajtur me gurë. E njëjta gjendje vijon edhe në Jeruzalem, ku policët e armatosur janë përplasur me protestuesit. Pamjet: AFP