Disa muaj pas vrasjes së 15 gushtit të këtij viti, ku mbeti i vrarë 14-vjeçari Erald Xhejo nga një bashkëmoshatari i tij, Gjykata e Apelit Tiranë ka nxjerrë nga qelia babanë dhe xhaxhain e autorit, Edison Guri dhe Roland Guri, të cilët ishin të akuzuar për fshehje të krimit. Ndërkohë, familjarët e viktimës e kanë konsideruar këtë një padrejtësi nga ana e gjykatës dhe kërkojnë kthimin e tyre në qeli. "Nuk kemi dashur të japim intervista se sa herë flasim nuk durojmë dot. Ne kërkojmë drejtësi, deri dje kishim besim tek drejtësia, por nuk e di se çfarë mund të bëhet. Nuk e di argumentin, nuk ka dalë vendimi akoma, thjesht një gjyqtare nga Tirana i ka nxjerrë. Jemi shumë të shkatërruar. Të vetmin ngushëllim e kishim në drejtësia, por siç po ndodhin gjërat… nuk dimë më se ku të kemi besim dhe çfarë mund të bëhet!” Vendimin e ka dhënë gjykatësja e Gjykatës së Apelit, Lutfije Celami, e cila ka ndryshuar masën e sigurisë nga “arrest në burg” në “arrest shtëpie” për shtetasit që akuzoheshin për fshehje të krimit.