Udhëheqësit e G7-ës shprehën shqetësimin e thellë për situatën në Lindjen e Mesme dhe dënuan sulmin e drejtpërdrejtë ushtarak të Iranit kundër Izraelit, i cili sipas tyre përbën një kërcënim serioz për stabilitetin rajonal. “Duhet të përfundojnë veprimet e rënda destabilizuese në të gjithë Lindjen e Mesme përmes organizatave terroriste dhe grupeve të armatosura të lidhura - duke përfshirë Houthi, Hezbollah dhe Hamas - si dhe grupe milicie të lidhura me Iranin në Irak". Ky ishte fillimi i dokumentit të ri të liderëve të G7 mbi evoluimin e situatës në Lindjen e Mesme të publikuar në mbrëmjen e së enjtes. Shtatë vendet më të fuqishme kanë shprehur hapur shqetësimin se përshkallëzimi i konfliktit rrezikon të bëhet i pakontrollueshëm nëse do të vazhdojnë sulmet për hakmarrje mes Izraelit dhe Iranit. Ndërkaq, i kanë bërë ape; Izraelit që të mos sulmojë civilët në Liban dhe të mos cenojë integritetin territorial të vendit. “Një cikël i rrezikshëm sulmesh dhe hakmarrjesh rrezikon të nxisë përshkallëzim të pakontrollueshëm në Lindjen e Mesme. Jemi thellësisht të shqetësuar për situatën në Liban. Duhet shumë kujdes që të mos destabilizohet edhe më shumë situata mes Izraelit dhe Libanit dhe kërkojmë që të rivendoset plotësisht sovraniteti, integriteti territorial dhe stabiliteti i Libanit dhe për të kthyer qytetarët e zhvendosur në shtëpitë e tyre”, thuhej ndër të tjera në deklaratën e përbashkët të G7-ës.