Më shumë se ⅓ e deputetëve rezulton që të mos jenë paraqitur në punë në muajin maj. Kjo shifër është raportuar në listëpagesën e deputetëve të muajit korrik, e publikuar tashmë në faqen zyrtare të Kuvendit. Jo pak, por 38 prej tyre kanë të regjistruara mungesa nga 1 deri në 6 ditë në punë, e për këtë arsye administrata e Kuvendit ka firmosur heqjen e pagës për këto ditë. Rekordin e mban deputetja demokrate, Orjela Nebiaj që ka munguar plot 6 ditë dhe nga rroga i janë mbajtur 60 mijë lekë. Nuk ka mbetur mbrapa as deputeti socialist Agron Çela i cili ka regjistruar 5 mungesa, Agron Shehaj me 4 mungesa dhe Plarent Ndreca me 3 mungesa. Ndërkohë, në pasqyrat financiare të muajit qershor, ku janë publikuar si rrogat, ashtu edhe dietat e deputetëve, duket se një pjesë e mirë e deputetëve marrin më shumë shpërblime për telefonat, karburantin, hotelin dhe vizitat brenda e jashtë vendit, se sa rrogë për punën e tyre në komisione dhe seancë plenare. Në llogaritë bankare të disa ligjvënësve kaluan mbi 400 mijë lekë të rinj.