Presidenti i Shteteve të Bashkuara të Amerikës, Donald Trump, miratoi eksportin e parë të pajisjeve ushtarake në drejtim të Ukrainës që prej kohës kur është kthyer në krye të Shtëpisë së Bardhë, ka raportuar “The Times”. Administrata Trump e ka informuar Kongresin se planifikon të eksportojë pajisje të mbrojtjes në Ukrainë përmes shitjeve të drejtpërdrejta komerciale prej 50 milionë dollarë ose më shumë. Njoftimi u bë një ditë para nënshkrimit të marrëveshjes për mineralet e rralla ndërmjet Kievit dhe Washingtonit. Ukraina zotëron depozita të konsiderueshme të mineraleve kritike, përfshirë mineralet e rralla të tokës. Mineralet si litiumi, titani, zirkoni dhe grafiti janë vitale për industrinë moderne. SHBA-ja kërkon qasje në më shumë se 20 lëndë të para që i konsideron me rëndësi strategjike, përfshirë depozitat e titanit (që përdoret për krahët e aeroplanëve dhe prodhim të pajisjeve ajrore) dhe uraniumit (që përdoret për energji bërthamore, pajisje mjekësore dhe armë), sic shpjegon REL. Ukraina gjithashtu ka rezerva të litiumit, grafitit dhe manganit – përbërës kyç për bateritë e makinave elektrike. Trump tha se marrëveshja “në teori” nënkupton se SHBA-ja do të përfitojë më shumë nga Ukraina sesa ka dhënë.