Presidenti i Shteteve të Bashkuara të Amerikës, Donald Trump, bën një tjetër lëvizje për t’i dhënë fund agresionit rus në Ukrainë, që vijon prej më shumë se tre vitesh. Këtë të hënë, Trump ka zhvilluar një bisedë telefonike me Presidentin e Turqisë, Rexhep Taiyyp Erdogan, prej ku njofton se do të punojë me të për të ndalur sa më shpejt luftën mes Rusisë dhe Ukrainës. “Sapo zhvillova një bisedë telefonike shumë të mirë dhe produktive me Presidentin e Turqisë, Rexhep Erdogan, në lidhje me shumë tema, duke përfshirë Luftën me Rusinë/Ukrainën, gjithçka që ka të bëjë me Sirinë, Gazën dhe më shumë. Mezi pres të punoj me Presidentin Erdogan për t'i dhënë fund luftës qesharake, por vdekjeprurëse, midis Rusisë dhe Ukrainës - TANI!”, shkruan Trump. Më tej, Kreu i Shtëpisë së Bardhë shprehet se ka marrë ftesë nga Erdogan për të vizituar Turqinë, ndërsa thekson se edhe homologu i tij turk do të shkojë në Uashington. Trump thekson se gjatë mandatit të tij të parë si President i SHBA kishte një bashkëpunim të ngushtë me Erdogan, teksa kujton edhe faktin se ky i fundit plotësoi kërkesën e tij për kthimin në Shtetet e Bashkuara të të burgosurit Pastor Andrew Brunson.