Firmat ligjore Kasowitz Benson Torres LLP dhe Mishcon de Reya u kanë dorëzuar një letër zyrtare përfaqësuesve të ambasadave të huaja dhe organizatave ndërkombëtare në Shqipëri, në emër Erion Veliajs, i cili ndodhet në paraburgim. Në letër kërkohet angazhimi i tyre për të monitoruar në mënyrë aktive seancën gjyqësore të datës 8 maj në Gjykatwn Administrative, si dhe kërkohet që kjo procedurë të transmetohet drejtpërdrejt. Seanca në fjalë do të trajtojë një çështje kyçe që lidhet me ligjshmërinë e emërimit të prokurorit Ols Dado, i cili është prokurori kryesor në çështjen penale ndaj Kryetarit Veliaj. Në përmbajtjen e letrës, Veliaj paraqet një kontestim të detajuar ligjor, duke pretenduar se Ols Dado nuk ka përmbushur kriteret e detyrueshme të parashikuara nga legjislacioni shqiptar për ushtrimin e funksionit të prokurorit. Sipas tij, mungesa e përfundimit të Shkolla e Magjistraturës, ose mungesa e një përjashtimi të ligjshëm nga ky detyrim, e bën të pavlefshëm emërimin e tij dhe, për rrjedhojë, të gjitha veprimet e ndërmarra prej tij në këtë cilësi konsiderohen juridikisht të cenueshme që nga fillimi. Në letër, Veliaj shpreh shqetësimin se çështja mund të mbyllet mbi baza procedurale, konkretisht për mungesë të “legjitimimit”, pa u shqyrtuar në themel argumentet ligjore të paraqitura prej tij. Ai paralajmëron se një zhvillim i tillë mund të ndodhë në kushte mungese transparence, larg vëmendjes së publikut dhe të komunitetit ndërkombëtar, çka sipas tij do të ngrinte pikëpyetje serioze mbi respektimin e parimeve të procesit të rregullt ligjor dhe sundimit të ligjit në vend. Dokumenti ndalet gjithashtu në pasojat konkrete që, sipas Veliajt, burojnë nga emërimi i një prokurori të pakualifikuar. Ai përmend ndër të tjera paraburgimin e zgjatur pa afat të përcaktuar, kufizimet në aksesin ndaj mbrojtjes ligjore dhe materialeve provuese, si dhe masa hetimore që, sipas tij, shtrihen në mënyrë disproporcionale edhe mbi familjen dhe jetën e tij private.