Bleu bukë në 1 maj, dhe kaq u desh që sindikatat në mbarë Francën të flisnin për një skandal të vërtetë, të shkaktuar sipas tyre nga kryeministri Sebastien Lecornu. Lecornu u shfaq i buzëqeshur teksa porosiste disa bageta në një furrë lokale, në prani të gazetarëve, dhe lajmi u përhap shpejt në mediat franceze, por po kaq shpejt, shpërthyen edhe polemikat. Arsyeja e pakënaqësisë lidhet me faktin se furra ishte e hapur gjatë festës, ndërkohë që sindikatat mbrojnë që të gjithë punëtorët të kenë pushim në Ditën Ndërkombëtare të Punëtorëve. Sipas ligjeve në fuqi në Francë, në 1 maj punojnë vetëm spitalet dhe shërbimet thelbësore, e punonjësit e tyre paguhen dyfish për ditën e punës. Statusi i furreve dhe bizneseve të tjera shërbyese mbetet i paqartë, ndaj qeveria e Lecornut po shqyrton një përjashtim ligjor për këto aktivitete. Sindikatat kundërshtojnë këtë nismë. Marylise Léon, sekretarja e përgjithshme e sindikatës më të madhe në Francë, e kritikoi kryeministrin, duke e cilësuar vizitën e tij si “teatër politik”. “Politikanët që vizitojnë furra janë një spektakël që nuk na duhet. Duhet të tregojmë si duket jeta reale e një bukëpjekësi,” tha ajo. Me lëvizjen e tij, Lecornu po përpiqej të promovonte një projekt-ligj të ri për të përjashtuar qartë dyqanet e pavarura të bukës dhe luleve nga detyrimi për pushim në Ditën e Punëtoëve.