Përplasjet brenda Lidhjes Demokratike të Kosovës janë thelluar pas refuzimit të marrëveshjes me Lëvizjen Vetëvendosje për zgjedhjen e presidentit. Gjashtë deputetë të LDK-së- Avdullah Hoti, Hykmete Bajrami, Kujtim Shala, Armend Zemaj, Arben Gashi dhe Janina Ymeri- nuk e mbështetën kandidaturën e Bekim Sejdiut, duke dalë kundër qëndrimit të Kryesisë së parties, cka sipas liderit të partisë Lumir Abdixhiku ishte një goditje e rëndë për procesin. Analistët politikë vlerësojnë se kriza nuk lidhet vetëm me kandidaturën e Sejdiut, por tregon për përcarje të thellë brenda LDK-së. “Lidhja Demokratike E Kosovës tashmë është e ndarë ideologjikisht. Janë evidente dy mënyra të të menduarit politik, të kundërta në aspektin e raportit ndaj përgjegjësisë për trashëgiminë e partisë dhe trajektores së ardhmërisë”, thotë Artan Muhaxhiri për Radion Europa e Lirë. Përgjegjësinë kryesore për këtë situatë ai ia atribuon Abdixhikut. Sipas Muhaxhirit, para se të arrinte marrëveshjen me LVV-në, kreu i LDK-së duhej t’i përfshinte në diskutime deputetët që mendonin ndryshe dhe të kërkonte “rrugë përbashkuese”, në vend se t’i vendoste ata para një akti të kryer. Edhe analisti Yll Hoxha e sheh përplasjen e fundit si simptomë të një problemi më të thellë. Sipas tyre, përplasja mund ta dobësojë partinë edhe në rast të zgjedhjeve të reja, ndërsa mbetet e hapur pyetja nëse konflikti do të çojë deri në një ndarje të LDK-së.