Rusia është e gatshme të dëgjojë propozime të mundshme të reja për zgjidhjen e konfliktit në Ukrainë, deklaroi ministri i Jashtëm rus Sergej Lavrov në një intervistë për televizionin RBC. Siç raporton agjencia Interfax, Lavrov kujtoi qëndrimin e Shteteve të Bashkuara, të cilat gjatë javëve të fundit ishin shprehur “të interesuara për zgjidhjen e krizës në Ukrainë”, duke shtuar “se duhej të kërkoheshin qasje të reja”. “Rusia është e gatshme të dëgjojë propozime të reja”, shpjegoi kreu i diplomacisë ruse. Lavrov rikujtoi fjalët e presidentit rus Vladimir Putin, sipas të cilit Rusia është gjithmonë e gatshme të negociojë, por nuk do të “shpallë asnjë armëpushim gjatë negociatave”. “Zjarri do të shuhet vetëm kur të arrihet një marrëveshje e plotë dhe afatgjatë”, theksoi ministri. Duke komentuar sulmet me dronë të Ukrainës ndaj rafinerive, magazinave dhe infrastrukturës civile ruse, Lavrov tha se Kievi po përpiqet të destabilizojë shoqërinë ruse. Sipas Lavrovit, “nuk duhet t’u dorëzohemi përpjekjeve që vetë Volodymyr Zelensky po i nxit në mënyrë aktive, me mbështetjen e evropianëve, për të destabilizuar shoqërinë tonë”. Komentet e tij erdhën ndërkohë që forcat ruse gjatë natës sulmuan në mënyrë të përsëritur rajonin ukrainas të Dnipropetrovskut, duke shkaktuar vdekjen e dy personave. Ndëra dronët ukrainas shënjestruan rafinerinë ruse të naftës Slavneft-Yanos në Jaroslavl, duke shktkuar të paktën dy vatra zjarri. Më herët ndërkohë, Donald Trump deklaroi nga Zyra Ovale se Vladimir Putin “nuk do të sulmojë vendet e NATO-s”. “Kam zhvilluar një bisedë të mirë me të”, tha presidenti amerikan teksa fliste me gazetarët.