Ceremonia mortore e ish-kryeministrit të Italisë Silvio Berlusconi është mbajtur në katedralen e Milanos, ku ka pasur pjesmarrës të liderëve botërorë, përfshirë edhe kryeministrin e Shqipërisë Edi Rama. Ai qëndroi në mesin e homologëve të tij, teksa mbaheshin ritet kryesore, të cilat u bënë në nder të një prej personave më me ndikim në vendin fqinj. Pjesë e ceremonisë së rëndësishme ishin 2300 zyrtarë që nderuan deri në fund funeralin e Berlusconit. Flamujt u ulën në gjysmë shtizë dhe anëtarët e familjes, duke përfshirë fëmijët dhe ish-bashkëshorten e tij u ulën në rreshtin e parë të katedrales. Arkivoli i Berlusconit u largua nga Villa San Martino në Arcore, jashtë Milanos dhe u transportua përmes qendrës së qytetit në katedralen gotike Duomo të Milanos për shërbimin e së mërkurës, e cila ëështë nje ditë zie për Italinë. Kur u largua nga katedralja trupi i tij, turmat kënduan himnin kombëtar italian, ndërsa ndiqej nga një kolonë e gjatë mjetesh. Trupi i ish-udhëheqësit pritet të digjet në Tempullin e Krematoriumit Valenziano Panta Rei në provincën e Alessandria. Vajtuesit u mblodhën në ambinetet e jashtme të katedrales së Milanos për funeralin shtetëror të Silvio Berlusconit , ish-kryeministrit përçarës dhe dominues, i cili mbeti i gjithëpranishëm në jetën publike italiane për dekada deri në momentet e fundit të jetës. Ata vendosën lule në nder të tij. Nga ana tjetër në ambintet e jashtme të katedrales u vendosën ekrane gjigante për të transmetuar ceremoninë. Berlusconi, i cili kishte një karrierë të gjatë dhe të mbushur me skandale, humbi jetën në një spital në moshën 86-vjeçare, për shkak të problemeve të shumta shëndetësore kohëve të fundit.