Nën masa të rrepta sigurie u përcoll për në banesën e fundit politikani i opozitës ruse, Alexei Navalny, i cili vdiq në rrethana ende paqarta dy javë më parë në një burg në Arktik. Mijëra rusë i dhanë lamtumirën e fundit në Moskë, kritikut të njohur të Kremlinit duke brohoritur emrin e tij dhe duke u betuar se nuk do t’i falin kurrë autoritetet për vdekjen e tij. Funerali pasoi një betejë të aleatëve të zotit Navalny me autoritetet e Kremlinit për të marrë trupin dhe organizuar ceremoninë e varrimit të kritikut më të ashpër Vladimir Putin. Në ceremoninë e varrimit ishin prindërit e tij Anatoliy and Lyudmila, të pikëlluar, ndërsa munguan dy fëmjët dhe bashkëshortja e tij Yulia Navalnaya, të cilët ndodhen jashtë Rusisë. “Nuk di si të jetoj pa ty, por do të bëj të pamundurën të të bëj të lumtur dhe krenar. Nuk e di nëse do ia dal, por do të përpiqem”, shkroi Yulia në rrjetet sociale pas varrimit. Ceremonia u ndoq gjithashtu nga më shumë se një çerek milioni njerëz përmes kanalit në Youtube të zotit Navalny, i cili është i bllokuar në Rusi. Pas ceremonisë në kishë shpërthyen thirrjet “Rusia do të jetë e lirë”, “Rusia pa Putnin” dhe “Putini është një vrasës”, kjo pasi mbështetësit e Navalny thonë se ai është vrarë nga autoritetet, por Kremlini mohon të ketë dorë në vdekjen e tij. Diplomatë të huaj, përfshirë ambasadorët e Shteteve të Bashkuara dhe Francës në Rusi, morën pjesë në funeralin e politikanit Navalny, pavarësisht se Kremlini e konsideroi ceremoninë organizim të paligjshëm. Qindra rusë janë arrestuar vetëm pse kanë dërguar lule nëpër qytet për ta përkujtuar kritikun më të ashpër të Vladimir Putin. Pamjet: AFP