Në Moldavi ka nisur numërimi i votave për zgjedhjet kyç parlamentare, ku qytetarët votuan për të zgjedhur një nga dy rrugët: vazhdimin e integrimit drejt Bashkimit Evropian apo kthimit drejt Rusisë, mes raportimeve të shumta për ndërhyrje në fushatë nga Kremlini. Në zgjedhje u përballën partia në pushtet e presidentes, Maia Sandu, Veprimi për Solidaritet (PAS) kundër Bllokut Patriotik, një aleancë proruse. Sipas rezultateve të para, nga numërimi i më shumë se 30 përqind të votave, Partia pro BE ‘Veprim dhe Solidaritet’ (PAS) e presidentes Maia Sandu kryeson me 40 përqind të votave, ndaj pro-rusëve, që deri më tani kanë fituar 31 përqind. Numërimi do të vijojë gjatë gjithë natës, ndërsa vendimtare do të jenë edhe votat e diasporës, të cilat tradicionalisht orientohen drejt Evropës. Në total, kanë votuar mbi 1.59 milionë qytetarë, që përbën 51.9 % të numrit të përgjithshëm të votuesve të regjistruar në listën zgjedhore. Mbi 1.32 milion votues, ose 47.41%, kanë votuar në territorin e Moldavisë, ndërsa pjesa tjetër në qendrat e votimit jashtë vendit. Në ditën e zgjedhjeve, në disa qendra të votimit në Moldavi, por edhe jashtë vendit – ku po voton diaspora – ka pasur njoftime të rreme për bomba. Ndërkohë, Policia Kombëtare paralajmëroi se “ka informacion për disa grupe personash që synojnë, duke filluar nga mesnata dhe gjatë gjithë ditës së hënë, të organizojnë trazira dhe destabilizim në kryeqytet, si pjesë e një proteste të paralajmëruar për të hënën.” Moldavia gjendet në kufi me Ukrainën, e cila po përballet me pushtimin e nisur nga Rusia më 2022. Ky konflikt e ka goditur rëndë ekonominë e Moldavisë, ka shkaktuar ndërprerje në tregti dhe ka rritur çmimet e energjisë, duke shkaktuar rritje të inflacionit.