Presidenti i Shteteve të Bashkuara të Amerikës, Donald Trump, tërhiqet nga tarifat ndaj vendeve evropiane, që kundërshtuan planin e tij për të marrë nën kontroll Groenlandën. Pas një takimi me Sekretarin e Përgjithshëm të NATO-s, Mark Rutte, në Davos, ku ndodhen për Forumin Ekonomik Botëror, Trump njoftoi tërheqjen nga tarifa prej 10%, që do të hynte në fuqi nga 1 shkurti. “Bazuar në një takim shumë produktiv që kam pasur me Sekretarin e Përgjithshëm të NATO-s, Mark Rutte, kemi formuar kornizën e një marrëveshjeje të ardhshme në lidhje me Groenlandën dhe, në fakt, të gjithë Rajonin Arktik. Kjo zgjidhje, nëse arrihet, do të jetë një zgjidhje e shkëlqyer për Shtetet e Bashkuara të Amerikës dhe të gjitha vendet e NATO-s. Bazuar në këtë mirëkuptim, unë nuk do të vendos Tarifat që ishin planifikuar të hynin në fuqi më 1 shkurt”. Më tej, kreu i Shtëpisë së Bardhë theksoi se me negociatat për Groenlandën do të merren zëvendëspresidenti JD Vance, Sekretari i Shtetit, Marco Rubio, dhe i Dërguari Special, Steve Witkoff. Menjëherë pasi presidenti Donald Trump njoftoi tërheqjen nga tarifa ndaj aleatëve evropianë, pati një rritje të ndjeshme të tregjeve amerikane. Sipas raportimeve në mediat botërore, indekset kryesore amerikane shënuan rritje.