Pas pesë vitesh pritje, 210 familje të mbetura të pastreha nga tërmeti i 26 nëntorit 2019 do të bëhen me shtepi të reja në Durrës. Pas shortit të hedhur një ditë më parë për një grup të vogël familjesh, kjo e premte solli shortin e madh të ndarjes së apartamenteve 3+1 që janë pjesë e kompleksit të ndërtuar në Spitallë, ku ndodhen 996 njësi banimi, falë investimit të Emirateve të Bashkuara Arabe. Ky ishte shorti i tretë i madh për ndarjen e apartamenteve në lagjen e re të Spitallës, pas atyre të realizuara në gusht dhe shtator. Megjithatë, ende asnjë nga familjet përfituese nuk është futur në to. Shumë prej familjeve përfituese janë nga njësitë administrative Sukth, Ishëm, Rrashbull, Manëz dhe Katund i Ri. Me prishjen nga tërmeti të shtëpive të vjetra, ata do të gëzojnë apartamentet e reja në Spitallë, një zhvendosje që sjell lehtësim, por dhe dilema. Procesi i Rindërtimit në Durrës mbetet i hapur, pasi ende ka raste të pasistemuara dhe ne shqyrtim. Tërmeti i 2019-ës dëmtoi mijëra familje në Durrës, epiqendra e tragjedisë, duke i lënë për vite të tëra në pritje të një strehimi të sigurt.