Drejtuesi i fushatës së Partisë Demokratike për zgjedhjet parlamentare të 11 Majit, dhe një nga arkitektët e fitores së Donald Trump në SHBA, Chris LaCivita, pretendon se ka vizituar Australinë për të këshilluar Partinë Liberale në lidhje me çështje strukturore që lidhen me liderin opozitar, Peter Dutton. Por, sipas “The Guardian”, ky pretendim i LaCivita është mohuar prerë nga Koalicioni opozitar në Australi. Në një seri bisedash të fshehta të regjistruara nga organizatat “Correctiv” dhe “Qendra për Raportimin e Klimës”, dhe që publikohen nga “The Guardian”, strategu veteran republikan, LaCivita, u thotë gazetarëve të infiltruar se ka udhëtuar në Australi në fillim të muajit prill, në rolin e një konsulenti privat, për të ndihmuar Partinë Liberale me “çështje strukturore”. Kjo shpjegon edhe mungesën e tij në Tiranë gjatë kësaj periudhe.