Universiteti më i madh i Romës, La Sapienza, në të cilin Ilaria Sula studionte për shkenca statistikore, nderoi studenten shqiptare, e cila u vra me thikë nga ish i dashuri i saj me origjinë filipinase. Në një ceremoni të mbajtur në ambientet e universitetit, ku të pranishëm ishin dhe familjarët e të ndjerës, u vendos që një prej sallave të La Sapienza të mbante emrin e 22-vjeçares shqiptare. Ndërkohë, hetimet e autoriteteve italiane zbulojnë të tjera detaje të rënda nga vrasja makabre e studentes shqiptare nga i dashuri i saj filipinas, Mark Antony Samson. 23-vjeçari filipinas rrëfeu para hetuesve gjithë skenën e tmerrshme të krimit, duke thënë se e kishte goditur dy herë me thikë nga pas, duke i marrë jetën. “E godita dy herë me thikë nga pas dhe ajo vdiq menjëherë. U gjenda në dhomën time me trupin e Ilarias të shtrirë në tokë. E futa në dy thasë që kisha në kuzhinë, por zinin vetëm gjysmën. Më pas gjeta një valixhe më të madhe, e cila e zinte të tërën”, tha i riu para hetuesve italianë. Rezultatet e autopsisë, të publikuara nga prokurorja italiane, Maria Perna, zbulojnë se 22-vjeçarja shqiptare është dhunuara para se të qëllohej shumë herë me thikë. Sipas rezultateve të autopsisë, Ilaria Sula mund të ketë humbur ndjenjat nga goditjet e Mark Samson para se të goditej me thikë dhe të vritej. “Një hematomë e madhe, goditje me grusht ose ndonjë send në fytyrë, pastaj disa plagë me thikë në qafë dhe fytyrë, si dhe shenja në trup”, thuhet në përgjigjen e autopsisë. Pas krimit, 23-vjeçari filipinas tentoi t’i mashtronte të gjithë, duke iu dërguar mesazhe nga telefoni i Ilarias, por u zbulua pasi familjarët dhe miqtë e të resë ngritën alarmin për zhdukjen e saj, gjë që vuri në lëvizje autoritetet, të cilët gjetën trupin e pajetë të fshehur brenda një valixheje, në një zonë të pyllëzuar, pranë komunës Poli, në Itali.