Kuvendi kaloi pa pengesa të gjitha pikat e rendit të ditës në seancën plenare të së enjtes. Shumica u miratuan me votat e mazhorancës, por disa prej tyre morën vota edhe nga opozita Në paketën e miratuar përfshihen disa marrëveshje dhe projektligje me karakter ekonomik dhe ndërkombëtar. Me 87 vota pro u miratua protokolli shtesë për zgjidhjen e mosmarrëveshjeve në kuadër të CEFTA-s, ndërsa me 74 vota kaloi marrëveshja e financimit për përmirësimin e rrjetit të transmetimit të energjisë në veri të vendit, pas dëmeve të tërmetit të vitit 2019. Me 88 vota u miratua marrëveshja me qeverinë gjermane për projektin “Green Vjosa”, që synon zhvillimin e gjelbër të zonës së Parkut Kombëtar të Vjosës. Ndër vendimet e miratuara është edhe zgjedhja e Denar Bibës në krye të Komisionit të Autoritetit të Konkurrencës, me 73 vota pro.