Shtetet e Bashkuara të Amerikës reaguan ashpër ndaj deklaratës së përbashkët “gjithëserbe” mes Serbisë dhe Republika Sërpska në Bosnjë Hercegovinë. “Kjo buron nga dezinformatat ligjore dhe është e mbushur me plot gabime, tha të hënën Ambasada e Shteteve të Bashkuara në Sarajevë” Një i ashtuquajtur “kuvend gjithëserb” u mblodh të shtunën në Beograd, ku udhëheqës të Serbisë dhe të Republikës Sërpska, bënë thirrje për unitetin e serbëve në të gjithë rajonin. Në një postim në rrjetin social X, Ambasada amerikane njoftoi se “deklarata jo vetëm që nuk ndihmon në mbrojtjen e Marrëveshjes së Dejtonit për Paqe, siç pretendojnë autorët, por është sulm i qëllimshëm ndaj kësaj marrëveshjeje dhe ndaj institucioneve të Bosnje e Hercegovinës|. Kjo, sipas SHBA është e rrezikshme. Ambasada amerikane theksoi se deklarata e bëra nga zyrtarët e Republikës Sërpska, posaçërisht nga presidenti i saj Millorad Dodik dhe nga kryetari i Asamblesë Kombëtare të RS-së, Nenad Stevandiç, përbëjnë sulm ndaj integritetit territorial, sovranitetit dhe karakterit shumetnik të Bosnje e Hercegovinës”.