Administrata e Bidenit ka thënë të martën se do të njohë dhe do të mbështesë një qeveri të re siriane që heq dorë nga terrorizmi, shkatërron rezervat e armëve kimike dhe mbron të drejtat e pakicave dhe grave. Sekretari i Shtetit, Antony Blinken, deklaroi SHBA-ja do të punonte me grupet në Siri dhe partnerët rajonalë për të siguruar që tranzicioni nga qeveria e rrëzuar e presidentit Bashar al-Assad të vijojë pa probleme. Blinken nuk ka specifikuar se me cilat grupe do të punonte SHBA-ja, por Departamenti i Shtetit nuk e ka përjashtuar mundësinë e bisedimeve me grupin kryesor rebel sirian, pavarësisht përcaktimit të tij si organizatë terroriste. “Procesi i tranzicionit dhe qeveria e re duhet gjithashtu të mbështesin angazhimet e qarta për të respektuar plotësisht të drejtat e pakicave dhe të sigurojë që çdo rezervë e armëve kimike ose biologjike të sigurohet dhe të shkatërrohet në mënyrë të sigurt”, thuhet në deklaratën e Blinkenit. Sekretari amerikan i Shtetit ka shtuar se sirianët duhet të vendosin për të ardhmen e tyre dhe se vendet e tjera duhet të "mbështesin një proces gjithëpërfshirës dhe transparent" dhe të mos ndërhyjnë. Qeveria e Assadit u rrëzua të dielën gjatë ofensivës së udhëhequr nga grupi rebel Hayat Tahrir al-Sham, i njohur si HTS, i cili është cilësuar një "organizatë e huaj terroriste" nga SHBA-ja që nga viti 2012. Zëdhënësi i Departamentit Matthew Miller deklaroi se zyrtarët amerikanë "kanë aftësinë, kur është në interesin e shtetit, të komunikojnë ligjërisht edhe me një organizatë të caktuar terroriste".