Një mister i pazakontë historik dhe gjenetik ka përfshirë Islandën, duke vënë në dyshim identitetin e personit që prehet në një nga varret më të rëndësishme të vendit. Shkencëtarët dhe entuziastët e letërsisë po kërkojnë zyrtarisht hapjen e varrit të poetit dhe natyralistit të dashur kombëtar, Jonas Hallgrimsson, për shkak të dyshimeve të forta se në vend të tij mund të jenë varrosur eshtrat e një shitësi ushqimesh nga Danimarka. Hallgrimsson, i cili vdiq në vitin 1845 në Kopenhagen pasi ra nga shkallët, konsiderohet si mjeshtri i ripërtëritjes së gjuhës islandeze dhe babai i romantizmit kombëtar. Eshtrat e tij u riatdhesuan në vitin 1946, pak para se Islanda tw shpallte pavarwsinw nga Danimarka. Megjithatë, për shkak se trupi i tij kishte qëndruar për një shekull në një varr të përbashkët në Kopenhagen me një tregtar, gruan dhe fëmijën e tij, dyshohet se mbetjet u përzien përpara se të niseshin drejt Islandës. "Ne nuk kemi as kafkë dhe as këmbë në atë varr", pohon Pall Valsson, autor i biografisë së poetit. Gjenetisti i njohur islandez, 77-vjeçari Kai Stefansson, po udhëheq nismën për të kërkuar një test ADN-je mbi mbetjet që ndodhen në parkun historik të Thingvellir. Mirëpo, autoritetet islandeze kanë deklaruar se nuk mund të lejojnë hapjen e varrit pa një urdhër të prerë gjykate, duke e zvarritur procesin nëpër komisione burokratike. Ndërsa debati vazhdon të mbajë gjallë vëmendjen mbi figurën e poetit, shumë islandezë mbeten të ndarë, pasi një pjesë e mirë e tyre preferojnë që ky mister të mos zgjidhet kurrë.