Gjykata e Posaçme vendosi t’i kthejë makinën Klea Gjatës, e cila po hetohet në gjendje të lirë si pjesë e grupit të Laert Haxhiut. E ëma e të resë, kishte dorëzuar një padi ku kërkonte “kthimin e sendit të sekuestruar sipas procesverbalit të datës 1 tetor 2023”, me pretendimin se makina luksoze e sekuestruar gjithë këto muaj, nuk ishte e vajzës Klea Gjata, por e saj. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar vendosi pranimin e kërkesës të paraqitur nga nëna e Klea Gjatës, për kthimin e Mercedes–Benz. Më herët, gjykata kishte rrëzuar kërkesën e vetë Kleas, ku tregonte se automjeti nuk ishte në emër të saj. 27-vjeçarja nga Lushnja, pjesë e grupit të Laert Haxhiut u arrestua gjatë operacionit të koduar “Never Forget” një vit më parë, pasi ndaj saj rëndonin veprat penale “Përkrahja e autorit të krimit” dhe “Moskallëzimi i krimit” dhe aktualisht po hetohet në gjendje të lirë.