E gjendur nën presionin që shkaktoi çështja e mbetjeve toksike të nisura drejt Tajlandës nga Porti i Durrësit, kompania turke “Kurum” ka kërcënuar se do të mbyllë aktivitetin e prodhimit të çelikut në Elbasan. Rreth 500 punetore te uzines Celikut dhe Petezimit jane njoftuar per nderprerjen e kontrates se njeanshme pa asnjë arsye. Megjithatë tani nuk ka asnje komunikim zyrtar nga drejtuesit e ‘kurum’ lidhur me këtë vendim. Hetimet e nisura nga Prokuroria për çështjen e mbetjeve toksike kanë identifikuar kompaninë turke “Kurum International” si burimin e këtyre produkteve, të cilat i janë shitur kompanisë “Sokolaj” shpk, që është eksportuesja e kontenjerëve. Sipas hetimeve, zbulohet se bëhet fjalë për mbetje të hirit nga trajtimi i gazeve të oxhakut në ish-Kombinatin Metalurgjik, të cilat deklarohen ndryshe edhe si oksid zinku. Sistemin e filtrave për kapjen e mbetjeve të hirit e ka instaluar vetë kompania Kurum për të reduktuar ndotjen e shkaktuar nga industria, por mbetet mister se ku i depoziton këto mbetje të krijuara pas procesit të prodhimit të shufrave të hekurit për ndërtim, nga shitja e të cilave ka fitime të konsiderueshme. Sipas verifikimeve të kryera nga Policia e Durrësit, të referuara më pas në Prokurori, një sasi prej 2800 ton mbetje të prodhuara nga Kurum dyshohet se i janë shitur kompanisë “Sokolaj” sh.p.k në tetor dhe nëntor të vitit 2023. Pronarja e kompanise Gjovana Sokolaj dëshmoi në polici se produkti me të cilin janë mbushur 102 kontenierët, që ajo e konsideron si oksid hekuri, është blerë nga kompania “Kurum” për një vlerë totale prej 41 mijë dollarësh. Më pas, Sokolaj ia ka shitur këtë sasi simotrës së saj në Kroaci, GS Minerals D.o.o për 141 mijë dollarë, ndërsa kontejnerët janë nisur nga porti i Durrësit me destinacion fundor Tajlandën më 4 korrik 2024. Ndërkohë anijet ‘Maersk Campton' dhe ‘Maersk Candor' me rreth 100 kontejnerë me mbetje të rrezikshme sapo të mbërrijnë në singapor, do të marrin sërish rrugën e kthimit drejt durrësit. Alarmi për transportin e mbetjeve të rrezikshme nga Shqipëria u dha nga Rrjeti i Aksionit të Bazelit (BAN), një organizatë eksperte në çështjet e drejtësisë mjedisore, e cila e ka marrë emrin nga Konventa e Bazelit e vitit 1989, ku përcaktohen kufizime të qarta për tregtimin e mbetjeve të rrezikshme.