Kryeministri Albin Kurti priti të martën në takim komandantin e misionit të NATO-s në Kosovë, KFOR, Oezkan Ulutash, me të cilin diskutuan për hapjen e urës kryesore mbi lumin Ibër në Mitrovicë. Në njoftimin e lëshuar nga Zyra e Kryeministrit, thuhet se Kurti e ka njoftuar komandantin e KFOR-it mbi punët e përgjithshme që po zhvillohen në urë dhe rezultatet paraprake të qëndrueshmërisë së urës. “Ndër temat qendrore ishte hapja e urës kryesore mbi Ibër në Mitrovicë si një gjë e drejtë, e nevojshme dhe e dobishme. Kryeministri Kurti e njoftoi komandantin e KFOR-it mbi punët e përgjithshme që po zhvillohen në urën kryesore mbi lumin Ibër”, thuhet ndër të tjera në njoftim. Më tej bëhet e ditur se Kurti është shprehur i bindur se liria e lëvizjes dhe sundimi i ligjit, “paqja dhe siguria janë të gjitha të mundura bashkë dhe të duhura”. Në këtë takim thuhet se gjithashtu u diskutua dhe rreth ballafaqimit me zjarret në këto ditë të nxehta vere dhe ndihmës që KFOR-i do të mund të ofronte në shuarjen e tyre që nisën me fusha e arritën maleve. Vetëm një ditë më parë, KFOR ka thënë se çdo veprim në lidhje me hapjen e urës mbi lumin Ibër duhet të merret në kuadër të dialogut në Bruksel.