Kryeministri i Kosovës Albin Kurti u takua në Bruksel me Komisionerin europian të Zgjerimit, Oliver Varheyli me të cilin ka diskutuar progresin e vendit të tij në rrugën drejt bllokut europian. Kurti e bëri te qartë se Kosova ka përmbushur kriteret për liberalizim të vizave dhe beson se BE-ja do ta mbajë premtimin.“E vlerësova diskutimin me Oliver Varhelyi mbi përparimin e Kosovës në Marrëveshjen e Stabilizim-Asociimit. I kemi përmbushur të gjitha kriteret për liberalizimin e vizave. Integrimi në BE s’ka alternativë. Jemi të motivuar të vazhdojmë reformat tona transformuese në bashkëpunim të ngushtë me BE-në”, u shpreh ai. Më herët, Kurti u takua edhe me përfaqësuesin e lartë të Politikës së Jashtme të BE-së, Joseph Borell. Muajin e kaluar, kreu i diplomacisë europiane kishte deklaruar se kërkonte një takim të nivelit të lartë mes Kurtit, dhe kreut të shtetit serb, Aleksander Vuçic përpara Krishtlindjeve. Për këtë angazhoi dhe të dërguarin e tij, Miroslav Lajcak, i cili fillimisht e takoi Kurtin në Austri, e më pas edhe realizoi vizita në Beograd e Prishtinë. Megjithatë, përpjekja e sllovakut për të bindur kryeministrin kosovar dhe Vuçicin, duket se ka dështuar.