Kryeministri i Kosovës, Albin Kurti, ka mbërritur në Ohër mbrëmjen e së premtes. Menjëherë ai ka lajmëruar në Tëitter bisedën me Këshilltarin e Departamentit Amerikan të Shtetit, Derek Chollet. Kurti tha se me Cholletin “diskutuam rëndësinë e kësaj fundjave për Kosovën, rajonin, integrimin euroatlantik dhe sigurinë”. Kurti bëri të ditur se në bisedë me Cholletin theksoi se pala kosovare është e përkushtuar që e nesërmja të jetë e suksesshme. Ndërkohë, në Ohër mbërriti edhe përfaqësuesi Special i Bashkimit Evropian për dialogun Kosovë-Serbi, Miroslav Lajçak. Ai ka zhvilluar një takim me presidentin e Maqedonisë së Veriut, Stevo Pendarovski. Lajçak ka falënderuar Pendarovskin për mikpritjen dhe e ka informuar atë për gjendjen e zhvillimeve në Dialog dhe pritshmëritë. Përfaqësuesi i Lartë i Bashkimit Evropian, Josep Borrell i cili gjithashtu ndodhet në Maqedoninë e Veriut u shpreh mbi bisedën që kishte zhvilluar me Sekretarin e Shtetit Amerikan, Antony Blinken, përpara takimit të Ohrit. Borrell tha se e informoi Blinkenin për raundin e ri të bisedimeve mes Kosovës dhe Serbisë në kuadër të dialogut të Brukselit.