Të enjten pritet të ndodhë takimi i ndarë mes kryeministrit të Kosovës Albin Kurti dhe presidentit të Serbisë Aleksandar Vuçiç, me katër liderët europianë. Bashkimi Evropian konfirmoi se liderët e dy vendeve janë ftuar në Bruksel në samitin e Këshillit Evropian më 26 tetor. Kurti dhe Vuçiç të kenë takime të ndara me katër liderët evropianë, me presidentin e Francës, Emmanuel Macron, kryeministren e Italisë, Giorgia Meloni, kancelari gjerman, Olaf Scholz, dhe përfaqësuesi i lartë i BE-së Josep Borrell. Nga ana tjetër zëdhënësi i BE-së, Peter Stano, foli për takimet e mbajtura në Kosovë dhe Serbi gjatë fundjavës, ku u shrpeh se blloku evropian ka paraqitur një propozim “modern evropian” për Asociacionin e komunave me shumicë serbe në Kosovë. Sipas tij, BE-ja pret që palët të ndërmarrin veprime të shpejta për normalizimin e raporteve. Teksa iu referua Aneksit për zbatimin e Marrëveshjes drejt normalizimit të raporteve të arritur më herët gjatë vitit, Peter deklaroi se marrëveshja prej 11 nenesh, përfshin një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu të gjitha marrëveshjet e mëhershme të dialogut. Takimet e paralajmëruara në Bruksel vijnë në kohën e rritjes së tensioneve mes Kosovës dhe Serbisë. Fillimisht tensionet u rritën gjatë muajit maj në veri të Kosovës, ku shpërtheu dhuna si pasojë e kundërshtimit të serbëve lokalë për marrjen e detyrës nga kryetarët e rinj shqiptarë. Më 24 shtator tensionet u përshkallëzuan pasi Policia e Kosovës u sulmua nga një grup i armatosur i serbëve, ku humbi jetën polici Afrim Bunjaku. Kosova ka fajësuar Serbinë për sulmin, por Beogradi ka mohuar përfshirjen në të, ndërkohë reagimet kanë qenë kritikuese nga ndërkombëtarët për sulmin e rëndë me pasojë në jetë njerëzore.