Ndrangheta është përballur me një seri kontrollesh në të gjithë Europën, si pjesë e hetimeve të Interpolit. Gjatë një operacioni të përbashkët policor në Itali dhe në Gjermani, 31 persona që dyshohet të jenë pjesë e organizatës mafioze u vunë në pranga e u sekuestruan para, drogë, armë dhe bizhuteri. Rreth 800 policë dhe zyrtarë të administratës fiskale nga të dy vendet u përfshinë në operacionin madhor kundër trafikut ndërkombëtar të drogës dhe pastrimit të parave. "Janë sekuestruar qindra mijëra euro, si dhe armë, kokainë, dy makina luksoze dhe bizhuteri,” tha Europoli, duke shtuar shtuar se "vlerësimi i parave në dorë të sekuestruara po vazhdon ndërkohë që janë bllokuar disa numra llogarish bankare.” Agjencia europiane e forcave të rendit ka shpërndarë në tëitter një video me xhirimet e bëra gjatë operacionit. Në Gjermani u kontrolluan bizneset në 46 pika të ndryshme në landet e Baden Vyrtembergut, Bavarisë, Renanisë Veriore-Vestfalisë dhe Hesenit. Nga tre fletëarrestet e lëshuara, policia gjermane ishte në gjendje të kryente me sukses vetëm një arrestim. Të dyshuarit mendohet të kenë trafikuar qindra kilogram kokainë nga Holanda në Itali. Po ashtu dyshohet, se ky grup ka qenë i përfshirë në një evazion të madh fiskal në Gjermani, duke furnizuar me produkte restorantet italiane që ndodhen në gjithë Gjermaninë, duke mos paguar taksa, dhe duke e dërguar mbrapsht në Itali fitimin e nxjerrë ilegalisht.