Pjesëmarrja e vakët dhe me numra modeste para Bashkisë duket se janë kthyer në problem brenda selisë blu, pasi për herë të parë pranohet edhe nga numri dy i Partisë Demokratike, Flamur Noka. Kjo e enjte shënoi protestën e 23 poshtë zyrës së Erion Veliaj, me kërkesën e njëjtë: Largimin e tij nga karrigia e kryebashkiakut! Por, deputetët edhe këtë herë numëroheshin me gishtat e dorës. Mesa duket per ta pushimet nuk kane përfunduar ende, megjithëse fund-gushti. Pasi bëri apelin ne protestë, në mbyllje të saj Sekretari i Përgjithshëm i PD Flamur Noka vendosi tu dërgojë një mesazh “zgjimi” anëtarëve të Kryesisë të cilët munguan, për t’iu kujtuar se ka ardhur koha të harrojnë pushimet dhe ti kthehen protestave duke vendosur edhe një kuotë pjesëmarrje. Protestat nuk janë detyrë vetëm e anëtarëve dhe simpatizantëve tanë. Jemi Kryesi e PD dhe duhet të jemi në ballë të cdo aksioni, proteste, përballje dhe revoltë. Ky angazhim kërkon më se paku pjesëmarrjen e cdo anëtari/e të kryesisë, të grupit parlamentar, këshillit kombëtar dhe pastaj edhe të strukturave të tjera të varësisë deri tek anëtarët dhe mbështetësit tanë në këtë aksion. Me shqetësim, Flamur Noka duket se sheh jo vetëm pjesëmarrjen në protestën para Bashkisë, por edhe poshtë ballkonit te Sali Berishës të cilin, mesa duket të vetmit që i kanë qëndruar besnikë në vapën e gushtit janë simpatizantët e thjeshtë të cilët i shkojnë cdo natë poshtë ballkonit sapo dielli nis dhe perëndon.