Partia Aleanca Maqedonase për Integrimin Europian (AMIE) shpreh shqetësimin e thellë dhe kundërshtimin e vendosur të komunitetit maqedonas të Bashkisë Pustec ndaj vendimit të Qeverisë Shqiptare për hapjen e tre qendrave pritëse për emigrantët në Njësinë Administrative Zrnosko, në fushën sportive të Pustecit dhe në fushën sportive të fshatit Dollna Gorica. Ky vendim “Për miratimin e Planit Kombëtar të Kontigjencës për flukset e përziera migratore 2026–2028”, i botuar në Fletoren Zyrtare, parashikon se në rast krize, për menaxhimin e flukseve migratore parashikohet ngritja e 20 qendrave pritëse për emigrantët gjatë dy viteve të ardhshme. Këto qendra janë planifikuar për emigrantë nga Afganistani, Pakistani, Irani, Siria, Libani dhe Gaza, të cilët përdorin Shqipërinë si vend tranziti drejt Bashkimit Europian. sinkron Aleanca e Maqedonasve për Integrimin Europian denoncon se ky vendim është marrë pa asnjë konsultim publik me banorët e komunitetit maqedonas të Bashkisë Pustec, pa përfshirjen e pushtetit vendor, duke shkelur rëndë parimet e vetëqeverisjes vendore, transparencës dhe demokracisë . Tre zonat e parashikuara për ndërtimin e qendrave pritëse ndodhen buzë Liqenit të Prespës, ndërkohë që territori i Bashkisë Pustec është pjesë e Parkut Kombëtar të Prespës, një zonë e mbrojtur me rëndësi të veçantë mjedisore, kulturore dhe turistike. Për më tepër, Bashkia Pustec është shpallur zonë turistike, ndërsa fshati Zrnosko është përfshirë nga vetë Qeveria Shqiptare në programin e 100 fshatrave turistike. Hapja e këtyre qendrave, e kombinuar me mungesën e plotë të investimeve shtetërore, rrezikon të thellojë edhe më tej emigrimin e banorëve të Bashkisë Pustec nga vendlindja e tyre, duke vënë seriozisht në rrezik ekzistencën dhe vazhdimësinë e komunitetit maqedonas në këtë zonë.