Këto janë momente kur një këmbësor kalon në mënyrë të gabuar rrugën dhe më pas përplaset nga një automjet, të cilit I del para. Mjeti siç edhe shihet nga këto pamje është duke ecur ngadalë por aksidenti ka qenë I pashmangshëm për shoferin. Kalime të gabuara të rrugës nga ana e këmbësorëve shikon pothuajse në të gjitha rrugët e Tiranës. Për të frenuar këto shkelje policia ka nisur të ndëshkojë të gjithë ata persona që nuk kalojnë pranë vijave të bardha. Ndërkohë gjoba të shumta janë vendosur edhe ndaj drejtuesve të biçikletave dhe të monopatinave. Sipas policisë rrugore në total gjatë javës që lamë pas janë vendosur 8102 masa administrative, kryesisht për shkelje që janë burime aksidenti. Po ashtu janë arrestuar dhe proceduar në gjendje të lirë 20 drejtues mjetesh pasi u kapën duke drejtuar automjetet nën efektin e lëndëve narkotike apo dhe alkoolit. Ndëshkime të shumta ka pasur dhe për drejtuesit e motorëve, për mosvendosje kaske. Policia thotë se do t’i vijojë kontrollet me qëllim rritjen e parametrave të sigurisë rrugore ndërsa apelon qytetarët që të lëvizin me kujdes dhe të respektojnë rregullat e qarkullimit rrugor.