Situata në Lindjen e Mesme duket se ka marrë një kthesë të papritur, ndërsa raportohet për një zbutje të mundshme të tensionit mes Iranit dhe Shteteve të Bashkuara. Sipas agjencisë “Reuters”, Irani është i gatshëm të shqyrtojë lejimin e lundrimit të lirë të anijeve në pjesën omane të Ngushticës së Hormuzit. Ky propozim, që sipas raportimeve është diskutuar në kuadër të negociatave, shihet si një hap i mundshëm për uljen e tensioneve në një nga pikat më të ndjeshme detare në botë. Ngushtica e Hormuzit mbetet një nyje strategjike për transportin global të naftës dhe çdo zhvillim në këtë zonë ka ndikim të menjëhershëm në tregjet ndërkombëtare dhe sigurinë energjetike. Ndërkohë, gjatë së mërkurës u diskutua edhe për një zgjatje të mundshme të armëpushimit dyjavor, por Uashingtoni e mohoi kategorikisht. Zëdhënësja e shtëpisë së bardhë, Karoline Leavitt i ka cilësuar këto raportime si të pasakta, duke thënë se “nuk kemi kërkuar zgjatje të armëpushimit”, ndërsa ka shtuar se bëhet fjalë për “raportim të dobët mediatik”. Më herët presidenti amerikan Donald TRump kishte deklaruar se lufta është shumë pranë përfundimit dhe se tregjet ndërkombëtare të karburanteve do të rikthehen në normalitet.