Qeveria shqiptare nuk ndryshon qëndrimin në mbështetje të Ukrainës pavarësisht deklaratës së presidentit Volodymyr Zelensky që nuk e njeh si shtet Kosovën. Kryeministri Edi Rama në një analizë në platformën x tregon pse Shqipëria do të vijojë të jetë në krah të Ukrainës, pa e parë lirinë si marrëdhënie shkëmbimi. Të qëndrosh kundër një lufte agresioni dhe në mbështetje të një paqeje të drejtë nuk është një faturë që e gris kur viktima e një agresioni barbar të zhgënjen. Nuk është një nder që shkëmbehet me një nder, por është ajo që ti je dhe ajo për të cilën qëndron në këtë botë të trazuar. Dhe, për fat të mirë, Shqipëria nuk është një njeri i vogël që bën hesapet se kush i detyrohet kujt, por Europa e Ballkanit, që tregon rrugën përmes besimit të saj te liria, demokracia dhe paqja, si dhe përmes forcës së shembullit të saj.