Një seri kërcënimesh anonime me bombë alarmuan kroacinë të hënën. Disa stacione policie, qendra tregtare dhe gjykata -- duke përfshirë edhe atë supreme e cila po mbante një takim me një delegacion nga Ukraina -- u evakuuan me shpejtësi. Policia tha se mori disa raporte për bomba që ishin vendosur në disa lokacione të ndryshme në të gjithë vendin. Media kroate raportojnë se nga kontrollet e policisë deri më tani nuk kanë gjetur asnjë pajisje shpërthyese. Radovan Dobronic, Presidenti i Gjykatës së Lartë kroate, i tha televizionit shtetëror HRT se një oficer sigurie e informoi atë për kërcënimin me bombë teksa po takohej me një delegacion nga gjykata supreme e Ukrainës, duke shtuar se atij i dukej se kërcënimi ishte i lidhur me takimin në fjalë. Kërcënimet anonime, vijnë mes një debati brenda udhëheqjes kroate nëse Bashkimi Evropian dhe vendi anëtar i NATO-s duhet t'i bashkohen një nisme perëndimore për të filluar trajnimin e ushtarëve ukrainas kundër forcave pushtuese ruse. Qeveria e Kroacisë është kryesisht në favor të fillimit të trajnimit, ndërsa presidenti Zoran Milanovic është kundër tij, duke thënë se kjo do të nënkuptonte përfshirjen e drejtpërdrejtë të Kroacisë në luftë. Kërcënimet anonime për bomba erdhën vetëm disa ditë pasi ambasadat dhe konsullatat e Ukrainës në gjashtë vende evropiane, përfshirë Kroacinë, kishin marrë pako me sy kafshësh. Nuk ka ende raporte se kush i ka dërguar këto pako dhe për çfarë qëllimi. Pamjet: AFP