Krizat e shumta nuk e kanë lëkundur ekonominë gjermane, e cila jeop sinjale të forta qëndrueshmërie. Të dhënat tregojnë se Prodhimi i Brendshëm Bruto (PBB) u rrit me 0.3 për qind në tremujorin e dytë të vitit 2026, krahasuar me tremujorin e mëparshëm, që sipas Zyres Federale të Statistikave do të thotë 0.1 pikë përqindjeje më shumë nga sa ishte llogaritur fillimisht. Me këtë rezultat, ekonomia më e madhe e Evropës ka shënuar rritje për të tretin tremujor radhazi, duke shtuar shpresat se rimëkëmbja e shumëpritur mund të jetë duke marrë formë. Sipas presidentes së zyrës në fjhalë, Ruth Brand, rritja është nxitur kryesisht nga eksportet. Në tremujorin e dytë, Gjermania eksportoi 2 për qind më shumë mallra dhe shërbime krahasuar me tremujorin e parë të vitit. Nga ana tjetër, konsumi privat dhe ai publik u rritën vetëm me 0.1 për qind secili, e investimet në makineri dhe automjete ranë. “Duke marrë parasysh parashikimet pjesërisht shumë të zymta për situatën ekonomike për shkak të luftës mes Iranit dhe Izraelit, rritja e ekonomisë gjermane është çuditërisht e qëndrueshme”, tha Thomas Gitzel, kryeekonomist i VP Bank në Lihtenshtajn. Perspektiva e saj sipas tij mbetet relativisht pozitive, e kjo duket i detyrohet edhe faktit që porositë në industrinë prodhuese janë në nivele të mira. Pavarësisht shenjave pozitive, financat publike thonë ekspertët mbeten një shqetësim i madh, pasi në gjashtë muajt e parë të vitit, shteti gjerman shpenzoi 71.3 miliardë euro më shumë sesa arkëtoi.